Erat oppidum Alesia in colle summo, admodum edito loco, ut nisi obsidione expugnari non posset; collis radices duabas ex partibus duo flumina subluebant. Ante id oppidum planities circiter milia passum tria in longitudinem patebat: reliquis ex omnibus partibus colles pari altitudine oppidum cingebant. Sub muro, partem collis ad orientem spectantem copiae Gallorum compleverant fossamque et maceriam sex in altitudinem pedum praeduxerant. Castra opportunis locis erant posita, ibique castella viginti tria facta. In castellis interdiu stationes ita ponebantur, ut vigilarent ne hostes subito eruptionem facerent; haec eadem noctu excubitoribus ac firmis praesidiis tenebantur.
