Erat oppidum Alesia in colle summo admodum edito loco. Huius collis radices duo duabus ex partibus flumina subluebant. Ante id oppidum planities circiter milia lassuum III in longitudinem patebat; reliquis ex omnibus partibus colles pari altitudinis fastigio oppidum cingebant. Sub muro omnem locum copiae Gallorum compleverunt fossamque et maceriam in altitudinem VI pedum praeduxerunt. Eius munitionis, quam Romani instituebant, circuitus X milia passuum tenebat.
